4. Nagmaal

Soveel van die spesiale oomblikke in die lewe gebeur rondom tafels. Dis waar ons gesels, eet, kuier, werk en soms selfs speel. Dis ook die plek waarheen ons elke keer weer terugkom. Na ‘n lang dag by die skool of werk, of nadat ons heel middag lekker gespeel het, kom sit ons aan by die tafel. Jesus het geweet dat om saam om te eet deel is van ons bestaan. Hy het een van die mees alledaagse gebeurtenisse in ons lewe gebruik om ons vir ewig te herinner aan wie Hy is. Die Nagmaal herinner ons ook dat ons sy navolgers is en wat ware gemeenskap is.

Die Nagmaal is ‘n fisiese teken wat ons herinner aan God se ewigdurende, onvoorwaardelike liefde vir ons. Wanneer ons die brood eet en wyn/sap drink, herinner dit ons dat Christus sy liggaam (brood) en sy bloed (wyn/sap) gegee het sodat ALMAL vergewe kan word en ALMAL mag deel in sy liefde.  Dis ‘n geleentheid waar ons vir ‘n oomblik nadink oor sy lyding, maar dit is ook ‘n fees wat ons vier saam met ander, juis sodat ons kan onthou dat Jesus ons almal liefhet en dat ons mekaar ook só moet liefhê.


Delf Dieper: Die Nagmaal

— Angelique Havenga

Lees meer:


Luister: Matteus 26: 26-30

Die instelling van die Nagmaal

26 En terwyl hulle eet, het Jesus brood geneem en die seën gevra. Daarna het Hy dit gebreek en vir sy dissipels gegee met die woorde: “Neem, eet; dit is my liggaam.”

27 Toe neem Hy ‘n beker, en nadat Hy die dankgebed uitgespreek het, gee Hy dit vir hulle en sê: “Drink almal daaruit,28 want dit is my bloed, die bloed waardeur die verbond beseël word en wat vir baie vergiet word tot vergewing van sondes.

29 Ek sê vir julle: Van nou af sal Ek nie weer van hierdie wyn drink nie tot op die dag wanneer Ek saam met julle die nuwe wyn in die koninkryk van my Vader sal drink.” 

30 Nadat hulle die lofsang gesing het, het hulle uitgegaan Olyfberg toe.

Kyk:

  • Wat sien jy raak in die prent bo-aan hierdie gedeelte?
  • Hoe help dit jou om oor die tema te dink?
  • Aan watter ander beelde of metafore kan jy dink om hierdie tema of teks uit te beeld?

Dink:

  • Dink aan een of meer spesiale maaltye in jou lewe. Hoekom het die herinnering jou bygebly?
  • Wat is die emosie wat hierdie teks by jou na vore bring. Hoekom?
  • Verbeel jouself jy was by toe Jesus die Nagmaal ingestel het. Hoe lyk dit? Hoe voel dit om daar te wees? Watter vraag sou jy vir Jesus wil vra op daardie oomblik?
  • Hoe sal jy die Nagmaal verduidelik aan iemand wat dit vir die eerste keer gaan gebruik?
  • Dink aan 5 verskillende woorde wat Nagmaal beskryf.

Doen:

  • Reël ‘n ete afspraak met iemand wat jy lanklaas gesien het of iemand wat jy voel dit nodig het.

Bid:

  • Gaan sit iewers rustig met iets om te eet en te drink en terwyl jy dit doen, dink aan wat die Nagmaal vir jou beteken. Praat met God daaroor. Dalk wil jy dankie sê, of dalk wil jy vergifnis vra.

Tiener-fokus:

  • Vind uit wanneer julle volgende Nagmaal-Sondag by die gemeente is. Hoe kan jy daar dien? Bv. help met die brood sny, die tekens uitdeel, opwas na die tyd ens.
  • Maak met ‘n groep vriende toebroodjies om te gaan uitdeel vir mense wat honger is. Probeer sommer om saam met die mense vir wie julle dit gee te eet as ‘n teken daarvan dat ons ander moet liefhê soos wat Jesus ons liefhet. 

Familie-fokus:

  • Bak brood saam as familie. Terwyl julle die brood bak gesels oor julle eerste Nagmaal ervaring of wat die Nagmaal beteken.